Isumaqatigiinngissuteqarluni Pitsaasumik aaqqeeqatigiinneq

Misigissutsitit oqaatigikkit

Kamakkaangatta aliasukkaangattaluunniit oqaatsit nuanniitsut oqaatigisoorsinnaasarpagut.

Taamaaliorneq iluaqutaaneq ajorpoq ajoqutaanginnartarlunili.

Taamaammat taarsiullugu qanoq misiginerlutit oqaatigisaruk, assersuutigalugu:

“Imatut ilioraangavit aliasulertarpunga.”

Eqqissisimasumik oqalugit

Eqqissisimasumik pissuseqarneq sallaatsumillu oqalunneq iluaqutaarujussuarsinnaapput.

Eqqissisimasumik oqalulluni imminut maluginiarnissaq ajornannginnerusarpoq taamaalillunilu qanoq misiginerup oqaatiginissaa ajornannginnerulerluni.

Isumaqatigiinnginnersi “qimalaaruk”

Eqqissisimanissat ajornartikkukku oqaasissatillu sissueruminaatsillugit, taava pitsassaaq pause-laaruit.

Pisuttualaarsinnaavutit, mobil-erujoorlutit eqqissisimanarisannilluunniit iliuuseqarlutit eqqarsarujuulaarlutit.

Ingerlanialeruit oqaatigisinnaavatit:

“Namminiilaarnissara pisariqartippara”

“Kisimiikkallarusuppunga”

Ikinngutisi allat ilanngunnagit

Ikinngutisi allat sussuteqanngitsut ilanngunniarsarigussigit misigisinnaapput arlarsi illersortariaqarlugu. Tamanna nuannernavianngilaq ilinnut kammalaatissinnullu.

Pitsaanerpaassaaq illit isumaqatigiinngissuteqarfigisallu nammineerlusi ajornartorsiutigisarsi aaqqiivigigussiuk.

Kammalaatisi ilanngunniarsarippata oqarsinnaavutit:

“Qujanaq ikiuukkusukkavit, kisianni nammineq ajornartorsiuterput aaqqissinnaavarput”

Utoqqatserit

Isumaqatigiinngittoqartillugu amerlanertigut inuk ataasiinnaq pisuuneq ajorpoq.
Taamaammat imaassinnaavoq marluullusi oqaaseqarsimassasusi iliuuseqarlusiluunniit aappaata ajuallaatigisaanik.

Amerlanertigut inuit iluameertumik utoqqatserfigineqaraangamik ilorraallattarput.

Utoqqatseruit imaassinnaavoq utoqqatserfigisat aamma utoqqatserusulertoq.

Inersimasumut ikioqqugit

Immissinnut ajunngitsumik oqaluullusi immissinnullu tusarnaarlusi misilereersimagussiuk sulilu ajornartorsiutisi aaqqissimanngippata taava inersimasumut ikioqquneq iluaqutaasinnaavoq.

Angajoqqaassinnuusinnaavoq, ilinniartitsisussinnut allamulluunniit.

Inersimasut iluaqutissamik nassaarnissamut iluaqutaasinnaasarput.